17 лістапада ва ўсім свеце адзначаецца Міжнародны дзень студэнтаў. 28 кастрычніка 1939 года ў занятай нацыстамі Празе мясцовыя студэнты і выкладчыкі выйшлі на дэманстрацыю, каб адзначыць гадавіну ўтварэння Чэхаславацкай дзяржавы. Акупанты разагналі мітынгоўцаў, пры гэтым быў застрэлены студэнт Ян Оплетал.
У Беластоку ў межах свайго музычнага тура па Еўропе выступіў бард Яўген Барышнікаў. Канцэрт адбыўся ў пабе «Beer4you» і быў арганізаваны нядаўна заснаваным беларусамі Беластоцкім музычным клубам.
Лукашэнка сваім указам прызначыў Адзіны дзень галасавання, калі ў Беларусі павінны вызначыць дэпутатаў Палаты прадстаўнікоў і мясцовых саветаў. Гэта першая электаральная кампанія пасля прэзідэнцкіх выбараў 2020 года. У Беларусі зачышчана ўсё поле грамадзянскай актыўнасці. І тым не менш ініцыятыва «Праваабаронцы за свабодныя выбары», якая шмат разоў арганізоўвала і праводзіла незалежнае назіранне на выбарах рознага ўзроўню, абвясціла, што і гэтую кампанію не пакіне па-за ўвагай. Тое, як праваабаронцы збіраюцца ацэньваць легітымнасць вызначэння дэпутатаў мы даведаліся ў юрыста і аналітыка кампаніі «Праваабаронцы за свабодныя выбары» Паўла Сапелкі.
Прэзентацыя новай кнігі пісьменніка і журналіста Алеся Аркуша «Вечар – як сон, у якім шмат агнёў» прайшла ў беластоцкім хабе «Новая зямля». Пад адну вокладку сабраныя найбольш адметныя героі яго прозы. Напрыклад, Іван Шагойка, які падрабляў для партызанаў накладныя на нямецкія склады, і партызаны па іх паспяхова атаварваліся. Прыгодніцкая кніга выйшла ў выдавецтве «Камунікат.org» накладам каля 200 асобнікаў. Наш карэспандэнт Уладзімір Лапцэвіч пагутарыў з аўтарам аб новым выданні.
Вясной гэтага года Дар’я Новік, Марыя Пятровіч і Андрэй Новік зачаравалі варшаўскую тэатральную публіку сваім музычна-містычным спектаклем «Замова». У пастаноўцы рэжысёра Максіма Шышко яны шапталі заклёны, чыталі сапраўдныя замовы і спявалі архаічныя мелодыі.
Дзве беларускія сацыял-дэмакратычныя арганізацыі – Беларуская сацыял-дэмакратычная партыя (Грамада) і Беларуская сацыял-дэмакратычная партыя (Народная грамада) сталі назіральнікамі ў Партыі еўрапейскіх сацыялістаў. Гэтага моманту яны чакалі два дзясяткі гадоў. Прыняццё да еўрапейскага сацыял-дэмакратычнага аб’яднання адбылося на Кангрэсе ў іспанскай Малазе пасля таго, як беларускія сацыял-дэмакраты страцілі магчымасць легальна працаваць у сябе на радзіме. Тым не менш, прадстаўнікі абедзвюх беларускіх арганізацый задаволены самім фактам юрыдычнага далучэння да еўрапейскіх аднадумцаў.
Неўзабаве мінае тэрмін паўнамоцтваў цяперашняга складу Каардынацыйнай Рады і сярод фракцый ужо ідзе падрыхтоўка да будучай выбарчай кампаніі. Ужо бачна, што па выніках праведзенай працы, некаторыя фракцыі могуць перафарматавацца. Так, напрыклад, аб магчымым сыходзе з моладзевай фракцыі радыё Ўнэт распавёў яе сябра Ян Рудзік. Цяпер ён плануе ствараць новую фракцыю ў КР – фракцыю беларускіх нацыяналістаў, арыентаваных на ідэі так званага «Міжмор’я» – палітычнага саюза дзяржаў балта-чарнаморскага рэгіёну.
Асацыяцыя беларускага бізнесу за мяжой ABBA праводзіць маніторынг бізнесу, уласнікамі якога з’яўляюцца грамадзяне Беларусі, у краінах Еўрасаюза. Вынікі першых даследаванняў АВВА прэзентавала на прэсавай канферэнцыі.
Выстава – гэта 52 плакаты, з іх – 9 прадстаўнікоў ЕГУ, студэнтаў і выкладчыкаў, якія зараз за кратамі. Плакаты выкананы вельмі лаканічна: на іх – здымкі палітзняволеных, тэрмін ды QR-код, праз які можна прачытаць крыху больш пра вязня.
У Непале забаранілі TikTok, таму што ён «парушае сацыяльную гармонію» у краіне і «распаўсюджвае непрыстойныя матэрыялы».
