Галоўная дзеючая асоба двух прапагандысцкіх сюжэтаў, знятых з удзелам КДБ Беларусі, палітычны актывіст з Магілёва, які зараз жыве ў Варшаве, Алег Аксёнаў прызнае ўласную неасцярожнасць, якая дазволіла лукашэнкаўскім спецслужбам выкарыстаць яго. У выніку ён міма сваёй волі за грошы стаў выконваць іх заданні па перадачы інфармацыі з разнастайных мерапрыемстваў, якія праводзіліся дэмакратычнымі арганізацыямі ў эміграцыі. Пры гэтым актывіст шчыра верыў, што перадае аўдытарскія справаздачы ў структуры ЕС і нават арганізуе за іх кошт навучальныя семінары. Падчас аднаго з іх, семінара па бяспецы, які адбыўся напрыканцы мінулага тыдня, прылюдна праз відэасувязь Аксёнава падзякаваў за супрацу намеснік кіраўніка следчага ўпраўлення КДБ Канстанцін Бычак. Радыё Ўнэт запыталася ў спадара Алега, як ён ставіцца да таго, што з ім здарылася, і ці ўсё, што паказалі пра яго па беларускім тэлебачанні, праўда.

У Варшаве прайшла канферэнцыя «Аўтарытарызм пад пагрозай. Беларуская палітычная сістэма пасля выбараў 2020 г. у параўнальнай перспектыве». Мерапрыемства адбылася на базе Інстытута сацыялогіі і філасофіі Акадэміі Навук Польшчы. Мэта – шматбаковая ацэнка стану беларускай палітычнай сістэмы пасля 2020 года і абмеркаванне імаверных сцэнарыяў далейшага развіцця сітуацыі ў Беларусі. Мерапрыемства складалася з трох панэляў, на якіх выступілі беларускія і польскія навукоўцы, даследчыкі і палітыкі.

25 лістапада ў Варшаве адбудзецца сумесная імпрэза EU NEIGHBOURS east і парталу adu.place, на якой будуць прадстаўленыя адукацыйныя магчымасці для маладых беларусаў і беларусак. Падзея пройдзе ў афлайнавым фармаце, а таксама анлайн на пляцоўцы ў YouTube. Больш падрабязна пра тое, хто будзе браць удзел у івэнце і пра што там можна будзе даведацца радыё Ўнэт распавяла галоўная рэдактарка парталу adu.place Кацярына Буніна.

Адвакаты, якіх лукашэнкаўскі рэжым пазбавіў права на прафесію з-за абарону палітвязняў і якія былі вымушаны эміграваць у розныя краіны, цяпер маюць сваю арганізацыю, зарэгістраваную ў Літве. Беларуская асацыяцыя адвактаў правоў чалавека – такая назва мусіць падкрэсліць, што для яе сябраў важны не толькі інтарэсы кліентаў, але і выпраўленне сітуацыі з правамі і свабодамі чалавека ў Беларусі. Акрамя таго, адвакаты-эмігранты не забываюцца пра тых калег, якія за сваю прафесійную працу апынуліся ў зняволенні. Больш падрабязна пра асацыяцыю радыё Ўнэт распавяла яе прэзідэнтка Марыя Колесава-Гудзіліна.