Кіраўнік Народнага антыкрызіснага ўпраўлення і прадстаўнік па транзіце ўлады ў Аб’яднаным пераходным кабінеце Павел Латушка наведвае Беласток. Адбылася сустрэча з маршалкам ваяводства Артурам Касіцкім. У цэнтры ўвагі — больш шчыльныя кантакты з дыяспарай і дапамога беларускім прадпрымальнікам-рэлакантам.
Як адразу адзначыў маршалак Артур Касіцкі, цяперашняя сустрэча з Паўлам Латушкам стала працягам дамоўленасцей, дасягнутых на сустрэчы ў ліпені мінулага года, калі Святлана Ціханоўская прыязджала ў Беласток на адкрыццё Сквера Вольнай Беларусі.
“ Размаўлялі мы перш за ўсё аб сродках еўрапейскіх фондаў, якія мы хочам, каб былі прызначаны для беларускай меншасці. Размаўлялі таксама аб звычайных праблемах беларускай дыяспары, беларускай меншасці тут у нашым рэгіёне, якія мы, як Маршалкоўская ўправа, маглі б дапамагчы вырашыць. Закончылі мы дэкларацый спаткання з беларускай меншасцю, каб была магчымасць асабіста пачуць, якія яшчэ маем пытанні, у якіх мы маглі б дапамагчы гэтым людзям”.
Самае галоўнае, што было зроблена за мінулыя паўгода – гэта прыняцця рашэння аб стварэнні і выдзяленні з бюджэту 3 млн злотых на функцыянаванне на Падляшшы Цэнтра беларускай культуры. Але гэта не адзіная падтрымка, на якую як беларусы могуць разлічваць ў, бадай, самым беларускім рэгіёне Польшчы.
“Шмат дзеянняў у сферы культуры, адукацыі альбо прамоцыі нашага ваяводства рэалізаваны альбо сумесна з прадстаўнікамі меншасці, альбо з рознымі няўрадавымі арганізацыямі, але таксама шмат сродкаў выдаткавана на такія дзеянні. Лічбы сапраўды непараўнальныя з тымі, якія былі чатыры-пяць гадоў таму. На што яны могуць разлічваць? На ўсё, чаго патрабуюць. Прыклад — Цэнтр беларускай культуры – інстытуцыя, якой супольнасць дамагалася 30 гадоў. У маёй ацэнцы яго ўдалося зрабіць і інстытуалізаваць практычна цягам шасці месяцаў. Канешне, пачалося ад спаткання з прэзідэнтам Дудай, з меншасцю ў Бельску-Падляшскім, калі гэтая тэма ўпершыню была ўзнятая. Пазней мы размаўлялі на нашым узроўні з раднымі, і ўвесь час думаем, як пашырыць працу Цэнтра. З’яўляюцца новыя ідэі, напрыклад, сёння прагучала ідэя заснаваць стыпендыі для таленавітых людзей мастацтва, такія штогадовыя стыпендыі падтрымкі. Шмат людзей з беларускай дыяспары атрымліваюць іх у Польшчы, але, аказалася, што ў нашым Падляшскім ваяводстве, у горадзе Беластоку такога няма”.
Як распавёў журналістам Павел Латушка, па апошніх статыстычных даных, у Польшы жыве ўжо каля 250 тысяч беларусаў, з іх 110 тыс. працуюць на падставе разнастайных працоўных дамоў, тут жа знаходзіцца 26 тыс. дзяцей, якія разам з бацькамі пераехалі з Беларусі. Найбольшая колькасць беларусаў пражывае ў Мазавецкім ваяводстве, на другім месцы– Падляшскае.
“Сярод тых пытаннях, якія мы будзем абмяркоўваць, гэта легалізацыя беларусаў. Хоць Польшча стараецца рабіць максімальна ўсё дзеля таго, каб беларусы адчувалі сябе тут добра. І я думаю, трэба аддаць належнае: Польшча з’яўляецца лідэрам сярод краін Еўрапейскага саюза па стварэнні ўмоў для жыцця беларусаў.
Размаўлялі пра пытанні гаспадарчага характару, бо 6 988 прадпрыемстваў створана ў Польшчы з удзелам беларускіх кампаній альбо грамадзян Беларусі. Гэта азначае, што ў іх ёсць беларускі капітал. Сярод іх 731 кампанія дзейнічае на тэрыторыі Падляшскага ваяводства. Таму мы прапанавалі арганізаваць канферэнцыю з удзелам ваяводстваў прыгранічных дзеля таго, каб абмеркаваць усе праблемы, звязаныя з легалізацыяй дзейнасці беларускіх прадпрымальнікаў, з легалізацыяй перанясення капіталу, з банкаўскай падтрымкай, іншымі пытаннямі. І я атрымаў таксама пазітыўную рэакцыю з боку маршалка, што такое мерапрыемства будзе арганізавана”.
Паводле сп. Латушкі, падобныя беластоцкай сустрэчы з ўладамі ваяводстваў прадстаўнікі АПК пачалі ў мінулым годзе і ўжо былі ў Любліне, Уроцлаве, Гожуве-Велькапольскім. Гэта дазваляе пашыраць веды палякаў пра тое, што сёння адбываецца ў Беларусі, а таксама перадаць мясцовым ўладам тыя пытанні і праблемы, якія стаяць перад беларусамі ў Польшчы. На сустрэчы ў Беластоку прысутнічалі таксама прадстаўнікі беларускай меншасці і дыяспары.
Рэпартаж з сустрэчы можна паслухаць у плэеры ніжэй
Comments are closed.