Святлана Ціханоўская разам з прадстаўнікамі беларускай грамадзянскай супольнасці прыняла ўдзел у адкрыцці Кантактнай групы па рабоце Рады Еўропы з Беларуссю.
У сваёй прамове Ціханоўская адзначыла, што гэта сапраўды ўнікальная сітуацыя. “Ніколі ў гісторыі Рады Еўропы дзяржава не была прадстаўленая нефармальным урадам. Але ў нашым выпадку гэта справядліва. Злачынцы не павінны мець права голасу, які вырашае будучыню Беларусі”, –падкрэсліла Ціханоўская.
Удзельнікі сустрэчы абмеркавалі прыярытэты, сярод якіх правы чалавека, палітвязні, інстытуты дэмакратыі і верхавенства права.
У Кантактную групу з боку Рады Еўропы ўваходзяць прадстаўнікі ўсіх ключавых палітычных арганізацый, у тым ліку ПАРЭ і Офіс камісара па правах чалавека. З боку Беларусі ў групе–10 чалавек, якія прадстаўляюць беларускія дэмакратычныя сілы, у тым ліку Каардынацыйную раду.
Нагадаем, што супрацу з афіцыйнымі беларускімі ўладамі Рада Еўропы прыпыніла ў сакавіку 2022 года ў сувязі з удзелам Беларусі ў ваеннай агрэсіі супраць Украіны. У той жа час камітэт вырашыў падтрымліваць і ўмацоўваць адносіны з беларускай грамадзянскай супольнасцю і дэмакратычнымі сіламі Беларусі.
Comments are closed.