Марш Годнасці-2022 аб’яднаў беларусаў Варшавы

У Варшаве прайшоў беларускі марш, прысвечаны другой гадавіне прэзідэнцкіх выбараў 2020 года ў Беларусі. У шэсці прынялі ўдзел, як мяркуецца, больш за дзве тысячы беларусаў, украінцаў і палякаў. 

Перад пачаткам маршу да прысутных звярнулася сузаснавальніца «Беларускага моладзевага хаба» у Варшаве, адна з арганізатарак марша Стася Гліннік. Таксама перад удзельнікамі марша выступіў прадстаўнік партыі БХД Яўген Дудкін, падкрэсліўшы важнасць аб’яднання беларусаў дзеля перамогі над рэжымам.

«Для нас галоўнае — свабода, дэмакратыя і шчасце кожнага беларуса. Я ўпэўнены, як Кастусь Каліноўскі паўплываў на наступных нашых нашчадкаў, якія дамагліся Беларускай народнай рэспублікі, так і мы зможам сёння бараніць сем’і і сяброў, захоўваць мову і веру, а таксама дапамагаць нашым братам — украінцам, бо, як казаў Кастусь Каліноўскі, толькі тады зажывеш у шчасці, калі над табой не будзе маскаля.»

Аднак ня толькі палітыкі і актывісты выступалі на мерапрыемстве: так, да прысутных звярнуўся і вядомы беларускі культурны дзеяч Аляксандр Ждановіч, якога звычайна пазнаюць па ролі Маляваныча. У сваёй кранальнай прамове ён адзначыў, як важна захоўваць нашую культуру для перамогі ў гэтай барацьбе, а скончыў свой выступ праніклівым чытаннем верша Ўладзіміра Караткевіча «Дзе мой край?».

«Вы зрабілі правільны выбар. Вы перамаглі свой страх, сваю абыякавасць, пра якую чамусьці казалі заўсёды… Вы неверагодныя, праўда! І самае галоўнае — не губляйце гэтага. Будзьце як дзеці, як казаў Хрыстос. І праўда, мне здаецца, што перамога і будзе тады, калі мы застанемся такімі, якія мы ёсць зараз.»

Падобны марш ужо праводзіўся ў Варшаве год таму, але сёлета арганізатары змянілі маршрут. Калона беларусаў прайшла ад плошчы Канстытуцыі да плошчы Замкавай у Старым горадзе, спыніўшыся таксама перад будынкам Еўракамісіі. Як гэта было, глядзіце ў нашым фотарэпартажы.