374 total views

«Беларускі змагар за свабоду і лаўрэат Нобелеўскай прэміі міру»: на кафедры беларусістыкі Варшаўскага ўніверсітэта адбылася сустрэча, прысвечаная жыццю і дзейнасці Алеся Бяляцкага. У імпрэзе прыняла ўдзел яго жонка Наталля Пінчук. Да падзеі, якая адбывалася ў адной з самых вялікіх аўдыторый факультэта прыкладной лінгвістыкі, далучылася каля сотні слухачоў − навукоўцаў і прадстаўнікоў акадэмічнай супольнасці, палітыкаў, грамадзянскіх актывістаў, журналістаў і студэнтаў.

У 2021 годзе рэжым Лукашэнкі асудзіў беларускага праваабарноцу Алеся Бяляцкага на 10 гадоў пазбаўлення волі. Кіраўнік і заснавальнік Праваабарончага цэнтра «Вясна» быў удастоены Нобелеўскай узнагароды, калі ўжо знаходзіўся за кратамі. Прэмію ў Осла атрымлівала яго жонка Наталля Пінчук. У Варшаве яна знаходзіцца ў межах тыдняў салідарнасці з Алесем Бяляцкім. 

− Спадарыня Наталля, спачатку Вы дзялілі з Алесем Бяляцкім яго лёс праваабаронцы, потым − лёс палітвязня, цяпер − лёс уладальніка Нобелеўскай прэміі. Калі гэта місія, калі гэта абавязак, то што галоўнае на гэтым шляху? 

− Пытанне вельмі складанае. Місія даецца нам зверху. А мой абавязак − гэта важнасць змагання за тое, каб у нас не было зняволеных, каб не было перапоўненых камер, каб гэта ўсё было як мага хутчэй у мінулым. 

− Магчыма, ёсць нейкія словы, якія вы заўсёды казалі адно аднаму? Як трымаецеся ў цяжкія хвіліны? 

− «Не бойся». Гэтая фраза гучала ў нас лейтматывам нават па нязначных момантах. 

− Мы знаходзімся ва ўніверсітэце, дзе шмат маладых людзей. Што б Вы маглі ім параіць? 

− Галоўнае па жыцці − гэта цікаўнасць да ўсяго і імкненне сябе развіваць ды ўдасканальваць. І каб гэта імкненне прыносіла не толькі задавальненне, а і карысць іншым. Тады ўсё будзе мець сэнс. 

На фота: Наталля Пінчук і Вінцук Вячорка.

Ідэя сустрэчы з Наталляй Пінчук ва ўніверсітэцкім асяродку налажала загадчыку кафедры беларусістыкі Радаславу Калеце. Прафесар адзначыў, што спатканне было скіраванае не толькі на тое, каб распавесці пра Алеся Бяляцкага ў кантэксце сённяшнай палітычнай сітуацыі ў Беларусі. Хацелася звярнуць увагу і на іншы бок жыцця праваабаронцы. 

На фота: прамаўляе загадчык кафедры беларусістыкі Варшаўскага ўніверсітэта прафесар Радаслаў Калета.

− Мы хацелі паказаць дзейнасць Алеся Бяляцкага ў галіне літаратуры. Распавесці польскай аўдыторыі, навукоўцам, акадэмічнаму асяроддзю, што Алесь Бяляцкі з’яўляецца сябрам Саюза беларускіх пісьменнікаў, быў аспірантам Інстытута літаратуры Нацыянальнай акадэміі навук, але адмовіўся ад абароны ад сваёй дысертацыі і выдаў яе як манаграфію «Літаратура і нацыя». З гэтай нагоды мы запрасілі спецыялістаў, якія распавядалі пра яго творы, — падводзіў вынікі сустрэчы Радаслаў Калета.

На фота: кандыдат філалагічных навук Катажына Дрозд-Урбаньска распавядае пра кнігу «Алесь Бяляцкі».

Канферэнцыя з удзелам Наталлі Пінчук доўжылася амаль 3 гадзіны. Імпрэзу адкрыў рэктар Варшаўскага ўніверсітэта прафесар Алаізій Новак. Ён звярнуўся да беларускіх студэнтаў і запэўніў, што Універсітэт заўсёды будзе для іх адкрыты і беларусы могуць лічыць яго сваім. 

На фота: рэктар Варшаўскага ўніверсітэта прафесар Алаізій Новак.

Распавядалі пра Алеся Бяляцкага і сваё сяброўства з ім Яўген Вапа і Вінцук Вячорка. Журналіст Радыё Свабода Валер Каліноўскі, які з’яўляецца аўтарам кніг пра Бяляцкага, падзяліўся малавядомымі фактамі з жыцця праваабаронцы. Паказалі ў Варшаўскім універсітэце і запіс выступу, які Алесь Бяляцкі зрабіў яшчэ на волі ў 2021 годзе.

На фота: Вінцук Вячорка і Яўген Вапа.
На фота: Валер Каліноўскі.

Галоўная госця спаткання − жонка нобелеўскага лаўрэата Наталля Пінчук − у сваёй вельмі кранальнай прамове, якая суправаджалася польскім перакладам, распавяла пра жахлівыя выракі, прыгадала сустрэчу з мужам перад паездкай у Осла і кранула самыя балючыя сёння для беларусага грамадства пытанні. «Алесь з іншымі палітвязнямі і Беларусь у цэлым абавязкова будзем вольнымі. Але дзеля гэтага трэба прайсці гэты ахвярны час», − завяршыла сваё выступленне спадарыня Наталля, пасля чаго адказала на пытанні. 

Яны датычылі і асабістага жыцця, і здароўя Алеся Бяляцкага, у якога цяпер вельмі моцна пагоршыўся зрок. Пыталіся і пра тое, як і чым можна падтрымаць праваабаронцу. 

− Лісты да Алеся не даходзяць, ліставанне з ім немагчымае. Але пісаць можна іншым, − раіла спадарыня Наталля. А вось паспрабаваць адправіць пасылку можна. Нават з Польшчы.

− Нацыя адбываецца з герояў. Для нас, для мяне асабіста Алесь Бяляцкі з’ўляецца менавіта тым нацыянальным героем, дзякуючы якому адбываецца новае адраджэнне Беларусі, − звярнуўся да Наталлі Пінчук са словамі падзякі кіраўнік НАУ Павел Латушка, які таксама прысутнічаў на сустрэчы. 

На фота: Павел Латушка.

Дыскусійнай часткай спаткання стала размова пра сучасную польскую перспектыву беларускіх падзей. Разважалі дырэктар Цэнтра ўсходнееўрапейскіх даследаванняў Варшаўскага ўніверсітэта прафесар Ян Маліцкі, рэдактар «Палітычнай крытыкі» Славамір Серакоўскі, амбасадар Польшчы ў Беларусі Артур Міхальскі і кандыдат у прэзідэнты Беларусі на выбарах 2006 года Аляксандр Мілінкевіч

− Ён малодшы за мяне, але і ў малодшых часамі таксама варта вучыцца. Я вучыўся яго разважлівасці, мудрасці, адданасці, сіле духу. Ён грамадскі дзеяч ва ўсім, чым займаўся. Адраджаў мову, гісторыю, будаваў структуры грамадзянскай супольнасці. «Вясна» − гэта ж не толькі Менск. Цэлая сетка. Я ні разу за сваё жыццё не чуў, што Бяляцкі недабараніў, недпрацаваў, штосьці скраў. Я не чуў. Алесь Бяляцкі − грамадскі лідар абсалютнага аўтарытэту. Гэта чалавек, за якім пойдзе абсалютная большасць, − распавёў пасля дыскусіі Аляксандр Мілінкевіч. 

На фота: спявае гурт Бартосікі.

Сустрэча ў Варшаўскім універсітэце завяршылася прамовай ксяндза Вячаслава Барка. Ён распавёў пра заангажаванне Алеся Бяляцкага ў веру і хрысціянства, а потым памаліўся за ўсіх, хто загінуў у Беларусі падчас пратэстаў і тых, хто знаходзіцца сёння ў турме. 

Рэпартаж цалкам слухайце ў плэеры ніжэй: 

Comments are closed.