Святлана Ціханоўская ўручыла медалі «Годнасць і гонар»: для гэтых людзей Беларусь была сапраўды перадусім

Святлана Ціханоўская ў Варшаве ўручыла медалі «Гонар і годнасць» блізкім загінулых беларускіх актывістаў, а таксама ваяроў, абараняўшых Украіну. Сярод узнагароджаных Раман Бандарэнка і Мікіта Крыўцоў. Імёны астатніх 7 узнагароджаных не называюцца.

Як адзначыла ў сваёй прамове лідар дэмакратычнай Беларусі Святлана Ціханоўская, сёння мы ўшаноўваем сапраўдных волатаў, адданых барацьбе і незалежнай Беларусі. Для іх Беларусь была сапраўды перадусім. Рашуча стаўшы на бок дабра, яны на ўвесь свет заявілі: беларусы ёсць, заўжды будуць, і хутка настане дзень, калі яны будуць вольныя.

«Медалі «Гонар і годнасць» былі заснаваныя ў Аб’яднаным пераходным кабінеце пасля запыту, які мы атрымалі ад беларускай грамадскасці, што нам трэба ўганараваць нашых герояў. На дадзены момант выраблена сто медалёў. Супольным рашэннем Аб’яднанага пераходнага кабінета і грамадскай камісіі па ўзнагародах, першымі ўзнагародзяць тых людзей, якія аддалі сваё жыццё за барацьбу, за дэмакратыю ў Беларусі. Але ёсць вельмі шмат годных беларусаў, якія паказалі свой супраціў, сваю рашучасць, сваю актыўнасць у змаганні з дыктатурай. І я думаю, што ў хуткім часе мы будзем перадаваць гэтыя ўзнагароды таксама асабліва адзначыўшымся беларусам. Вельмі важна паказваць, што мы памятаем і бачым іхныя добрыя ўчынкі. У сённяшніх умовах, на жаль, не ўсе ўзнагароды могуць быць перададзеныя блізкім. Галоўным чынам з прычынаў бяспекі. Да таго моманту, пакуль гэта не стане магчымым, медалі будуць знаходзіцца ў Аб’яднаным пераходным кабінеце, альбо ў палку імя Кастуся Каліноўскага».

Падрабязней слухайце ў плэеры ніжэй.