Беларуская Акадэмія ў Польшчы запрашае студэнтаў

Колькасць беларускіх студэнтаў у Польшчы расце штогод. У 2021 годзе у польскіх ВНУ навучалася 11 076 чалавек. Беларусы займаюць другое месца пасля ўкраінцаў (36 030 чалавек) сярод усіх студэнтаў-замежнікаў, якіх у Польшчы каля 86 тысяч. Прафесар Беластоцкага палітэхнічнага ўніверсітэта Святлана Куль-Сяльверстава называе прычыны, чым менавіта польская адукацыя вабіць нашых суайчыннікаў.

Найперш, апошнім часам Беларусь выключана з Балонскага працэсу, і зараз паўстае пытанне, наколькі прыдатным будзе беларускі дыплом для спецыяліста і ці можна з такім дыпломам канкурыраваць на рынку працы. Польская жа сістэма адукацыі даволі развітая, дыпломы польскіх ВНУ каціруюцца ў Еўропе.

Таксама Польшча папулярная праз блізкія мову і асяроддзе, культурную блізкасць польскага народу. З пункту гледжання мовы ў Польшчы беларусы адаптуюцца прасцей і хутчэй, чым, напрыклад, у Літве.

Беларускія студэнты ў значнай колькасці навучаюцца ў Польшчы ўжо не першае дзесяцігоддзе, такім чынам, можна сказаць, што існуе пэўная традыцыя. Таксама ўплываюць і хвалі эміграцыі — працоўнай да 2020 года і палітычнай пасля. Зараз для беларусаў няма праблемы знайсці суайчыннікаў у Польшчы, і гэта таксама спрыяе іх адаптацыі.

Працэс навучання ў польскіх ВНУ значна адрозніваецца ад беларускага. Па-першае, ад студэнтаў чакаюць значна большай самастойнасці: кожны мусіць дбаць пра свае веды сам, і ніхто не будзе кантраляваць поспехі студэнта, «цягнуць» яго, як гэта часта адбываецца ў Беларусі. З іншага боку, студэнты ў Польшчы маюць істотна больш правоў і прывілегій: так, напрыклад, яны могуць ацэньваць выкладчыкаў, якасць лекцый і семінараў, і маюць магчымасць памяняць выкладчыка, які не адпавядае іх патрабаванням.

Аднак, хаця польская мова і даволі блізкая да беларускай, не ўсе могуць хутка вывучыць яе на дастатковым для атрымання вышэйшай адукацыі ўзроўні. Апрача таго, за апошнія гады было звольнена шмат выкладчыкаў з Беларусі. Гэта стала нагодай для стварэння Беларускай Акадэміі, дзе можна дыстанцыйна атрымаць адукацыю на беларускай мове.

Беларуская Акадэмія працуе наступным чынам: адкрываецца новая спецыяльнасць на базе польскай ВНУ, заняткі праводзяцца онлайн, але пры гэтым студэнты Акадэміі маюць легалізацыю ў Польшчы і ўсе прывілегіі, якія ёсць у звычайных польскіх студэнтаў. Праца з дакументамі таксама максімальна спрошчана, у Акадэміі прымаюць электронныя версіі. Яшчэ ў Акадэміі ёсць уласны telegram-канал https://t.me/baedueu і адпаведны канал для пытанняў і прапаноў https://t.me/edu_ba_2021.

З моманту стварэння Беларускай Акадэміі ўжо праведзеныя два наборы, у тым ліку на магістарскую спецыяльнасць «Мэнэджмэнт у тэлебачанні, медыя і Інтэрнэце», якая пакуль што нідзе больш не прадстаўлена. Навучанне ў Акадэміі платнае, што забяспечвае важны момант — хаця Беларуская Акадэмія і атрымлівае пэўную дапамогу ад польскіх навучальных устаноў і арганізацый, у першую чаргу гэта ўсё-ткі самастойная ініцыятыва, якая не карыстаецца ніякімі фінансавымі грантамі.