Амаль тыдзень працягваюцца разнастайныя мерапрыемствы ў Беластоку, прысвечаныя 105-ай гадавіне абвяшчэння незалежнасці Беларускай Народнай Рэспублікі. Але кульмінацыяй святкаванняў, натуральна, стала 25 сакавіка, калі ў сталіцы польскага Падляшша, прайшлі ажно тры акцыі з нагоды Дня Волі: ускладанне кветак да месца, дзе быў закатаваны аўтар слоў гімна БНР Макар Краўцоў, мітынг на цэнтральнай плошчы горада і ўрачысты канцэрт. Распавядае наш беластоцкі карэспандэнт Уладзімір Лапцэвіч.
Дзень абвяшчэння незалежнасці Беларускай Народнай Рэспублікі на працягу ўжо некалькіх дзесяцігоддзяў не застаецца па-за ўвагай беларусаў, якія пражываюць у Беластоку. Мясцовыя ўлады са свайго боку даволі прыхільна ставяцца, асабліва ў апошнія гады, да найважнейшага свецкага беларускага свята. Так, летась, калі ў Беласток прыязджалі Святлана Ціханоўская і Павел Латушка, польскія палітыкі таксама выступалі на мітынгу з нагоды Дня Волі.
Сёлета арганізацыяй святочных мерапрыемстваў займаліся Беларускі саюз у Рэчы Паспалітай, прадстаўнікі беларускай дыяспары і Беларускае гістарычнае таварыства. Найперш яны ўшанавалі памяць Макара Краўцова, аўтара слоў гімна БНР «Мы выйдзем шчыльнымі радамі», які быў закатаваны бальшавікамі ў беластоцкай турме ў 1939 годзе. Бел-чырвона-белыя кветкі і вянок да будынку турмы ўсклалі прадстаўніца дыяспары Наталля Сцепанцова і старшыня Беларускага гістарычнага таварыства Алег Латышонак.
Асноўным і гучным мерапрыемствам на Дзень Волі ў Беластоку стаў мітынг на цэнтральнай плошчы горада – Рынку Касцюшкі каля помніка Юзэфу Пілсудскаму. На яго сабраліся некалькі сотняў чалавек, трымаўшыя патрыятычныя плакаты, бел-чырвона-белыя сцягі, практычна ў кожнага на грудзі была прышпілена бел-чырвона-белая стужка. У адрозненні ад леташняга мітынгу, сёлета на акцыі не выступалі польскія палітыкі і прадстаўнікі мясцовай улады, але сярод беларускіх сцягоў луналі польскія і ўкраінскія. Таксама з прывітальным словам выступіў і прадстаўнік украінскай грамады ў Беластоку.
Галоўны рэдактар Радыё Рацыі, старшыня Беларускага саюзу ў Рэчы Паспалітай Яўген Вапа ў каментары нашаму радыё распавёў пра святкаванне Дня Волі ў Беластоку і Польшчы ў цэлым.
З боку беларускай дыяспары заяўку на правядзенне мітынгу да ўлад горада падпісаў Ян Абадоўскі, які ўжо з канца 90-х гадоў мінулага стагоддзя пражывае ў Беластоку.
Пасля мітынгу многія яго ўдзельнікі прыйшлі ў будынак Усходнееўрапейскай акадэміі прыкладных навук, дзе адбыўся канцэрт з нагоды Дня Волі. Перад яго пачаткам прысутныя праслухалі пасланне старшыні Рады БНР Івонкі Сурвілы. Таксама былі ўзнагароджаныя асобы і арганізацыі за выдатную нацыянальную працу ў 2022 годзе. Сярод адзначаных – фонд «Тутака», журналістка і пісьменніца Ганна Кандрацюк-Свярубская, ліцэй у Гайнаўцы, актывістка дыяспары Кацярына Дзерман.
Музычную частку мерапрыемства адкрыў бард і оперны спявак Алег Кабзар, які ўжо амаль 25 гадоў як пераехаў з Беларусі на Падляшша.
У другой частцы канцэрта гледачы змаглі паслухаць сямейны гурт «Бартосікі» на чале са знакамітым выканаўцам Зміцерам Бартосікам. Што ж тычыцца канцэрта ў Беластоку, то тут свае вакальныя здольнасці збольшага праяўлялі дзеці Зміцера Бартосіка – Юстына Карпіловіч і Геральд Бартосік.
25 сакавіка грамадскія мерапрыемствы ў гонар 105 гадавіны абвяшчэння незалежнасці БНР супольным спяваннем гімну «Магутны Божа». Наперадзе – заняткі «Мова нанова» з назваю «Дзень Волі – Дзень мовы» і выступленне фрык-тэатра Ex Tempore.
Мы выкарыстоўваем файлы cookie, каб забяспечыць вам найлепшы вопыт на нашым сайце. Калі вы працягнеце выкарыстоўваць гэты сайт, мы будзем лічыць, што вы ім задаволены.OkПалітыка прыватнасці
Comments are closed.