Loading

20 кастрычніка ў парламенце  Малдовы дэпутаты стварылі парламенцкую групу «За дэмакратычную Беларусь». Прычым яе  стварэнне  выклікала  працяглыя і жарсныя спрэчкі. Супраць выступалі камуністы і сацыялісты, якія  пасля станоўчага рашэння пераважнай парламенцкай большасці  пакінулі залу пасяджэнняў парламента. Чым будзе займацца група, пагаварылі з яе кіраўніцай  Марынай Марозавай.

Фота: facebook.com/marinamorozovaRM

Наколькі малдаўскае грамадства і палітычныя структуры ведаюць пра сітуацыю ў Беларусі? 

Рэспубліка Малдова выступае за дэмакратыю, за свабоду слова, за правы чалавека і мір у рэгіёне. Асабіста я была здзіўленая, калі  ў 2018 ці 2019 годзе сустракалася з жанчынамі з Беларусі ў  Еўропе. Яны распавядалі нам як гэта – выйсці на мітынг, на пратэст, а потым апынуцца ў турме на некалькі дзён. І гэта расказвалі жанчыны з дзецьмі.   На жаль, мяркую, што малдаўскае грамадства не ведае пра ўсё, што адбываецца зараз у Беларусі. Калі ў вас былі пратэсты і ўвесь свет казаў  пра гэта, было больш інфармацыі. Цяпер той, хто зацікаўлены, можа знайсці інфармацыю. А так – людзі ведаюць, што ў нас ёсць партнёрства з Беларуссю ў плане экспарту ды імпарту прадуктаў. Але гэтым мы не дапамагаем людзям, якія прагнуць  дэмакратыі і свабоды.     

Як малдаўскія парламентарыі прыйшлі да ўсведамлення таго, што беларусам у барацьбе  за дэмакратыю патрэбна падтрымка? 

Рашэнне пра стварэнне гэтай групы было прынята на пленарным пасяджэнні парламента 20 кастрычніка 53-ма галасамі «за». Тры галасы былі супраць. Гэтым рашэннем парламент Рэспублікі Малдова ў чарговы раз пацвердзіў прыхільнасць пашырэнню  дэмакратычных каштоўнасцяў і абароне асноўных правоў і свабодаў чалавека. І яшчэ мы ў чарговы раз выказваем сваю салідарнасць з народам Беларусі, які імкнецца да свабоды і дэмакратыі. Мы прапануем дыялогавую пляцоўку гэтай групы паміж заканадаўчай уладай Кішынёва і дэмакратычным рухам Беларусі. Хачу адзначыць, што наша апазіцыя была супраць. Было вельмі шмат дыскусіяў на пленарным пасяджэнні. 

Чым камуністы і сацыялісты аргументавалі сваю пазіцыю, што не трэба падтрымліваць дэмакратычныя сілы Беларусі? 

На жаль, як я ўжо казала, наша грамадства ведае пра нашае партнёрства з Беларуссю, але парламенцкая апазіцыя зараз ставіць на адну карту чалавечыя жыцці, правы чалавека з яблыкамі ды іншымі прадуктамі, якія ідуць на экспарт у Беларусь. Мы лічым, што гэта не правільна, не дэмакратычна. Вельмі шмат было дыскусіяў. Наша апазіцыя казала, што ў нас ужо ёсць міжпарламенцкая група з Беларуссю. Канешне, апазіцыя кіравалася нашым сяброўскім супрацоўніцтвам з Беларуссю. Але на жаль, гэтае супрацоўніцтва не дапамагае беларусам, якія ваююць унутры сваёй Радзімы за дэмакратыю і правы чалавека. Мяркую, наша апазіцыя баіцца разбурыць сяброўскія стасункі  з рэжымам Лукашэнкам. Не ведаю, наколькі яны сяброўскія, але гэта іх мэсадж. 

Фота: facebook.com/marinamorozovaRM

Як гэтая апазіцыя рэагуе на тое, што на тэрыторыі Малдовы існуе квазідзяржаўнае ўтварэнне – Прыднястроўская малдаўская рэспубліка, якая парушае тэрытарыяльную цэласнасць Малдовы?

Наша апазіцыя не размаўляе на гэтую тэму, таму што яны таксама былі ва ўладзе і нічога не вырашалася. Гэты пункт зараз не ўключаны і яны маўчаць пра гэта. 

Ці ёсць нейкія канкрэтныя планы супрацоўніцтва з дэмакратычнай апазіцыяй Беларусі, магчыма з Аб’яднаным Пераходным Кабінетам, які стварыла Святлана Ціханоўская? 

Вядома ж, у нас будуць сустрэчы з дэмакратычнай Беларуссю і анлайн, і спадзяемся, што Святлану Ціханоўскую мы ўбачым у Малдове. У нас ужо было першае пасяджэнне са спадаром Анатолем Лябедзькам, які з’яўляецца прадстаўніком Святланы Ціханоўскай. Быў вельмі добры дыялог. Мы падтрымліваем іх і спадзяемся на далейшую супрацу.

Comments are closed.