Loading

Акцыя стартавала 3 траўня, у Міжнародны дзень свабоды друку. Як раз падаспеў новы рэйтынг свабоды прэсы ад «Рэпарцёраў без межаў», дзе наша краіна апусцілася яшчэ на тры пазіцыі і займае зараз 157-ае месца, побач з Палесцінай і Нікарагуа. Акрамя таго Беларусь прызнана самай небяспечнай краінай для прэсы ў Еўропе. Для таго, каб гэта зразумець варта пагаварыць з любым беларускім журналістам, які за апошнія два гады фактычна атрымаў забарону на прафесію ўнутры краіны, быў вымушаны з’ехаць і зараз працягвае сваю працу з-за мяжы. Па словах старшыні Беларускай асацыяцыі журналістаў Андрэя Бастунца «зачыстка» беларускай медыяпрасторы працягваецца і да гэтага часу.

«Зразумела, што любы аўтарытарны рэжым спрабуе кантраляваць распаўсюд інфармацыі, і зразумела, што журналісты, якія распавядалі пра тое, што адбываецца ў краіне, яны трапляюць пад гэты пераслед. Нягледзячы на тое, што тры гады прайшло, як скончыліся пратэсты, ціск працягваецца, варта толькі паглядзець на тэрміны, якія даюць тым, хто трапляе за краты».

Фота: БАЖ

Зараз за кратамі знаходзіцца 33 беларускія журналісты. З іх партрэтамі беларускія і літоўскія журналісты прыйшлі да знакамітага вільнюскага помніка «Першыя ластаўкі», які якраз сімвалізуе прагу да свабоды. А пасля журналісты выстраіліся ў літары S.O.S. і падалі сігнал міжнароднай супольнасці, што калег з Беларусі трэба тэрмінова ратаваць. Cтаршыня Саюза журналістаў Літвы Дайнюс Радзявічус заклікае далучацца да акцыі журналістаў па ўсім свеце.

«Мяне таксама судзілі, але, канешне, якія б у Літве ні былі суды, яны не настолькі страшныя як зараз рэжым у Беларусі. Там калегі рэальна ахвяруюць кожны дзень усім, што яны маюць. Мы павінны пасылаць весткі ўсяму свету, які за свабоду. Знак S.O.S. ведаюць усе, і гэта не проста просьба аб дапамозе, гэта заклік да тэрміновага ратавання, таму што людзі могуць загінуць. І мы павінны зрабіць усё магчымае, каб гэтага не здарылася. Еўрапейская федэрацыя журналістаў пачынае акцыю па ўсёй Еўропе, мы пачалі ў Вільні. Спадзяемся, што іншыя еўрапейскія краіны да нас далучацца, і інфармацыя пра тое, колькі беларускіх журналістаў зараз у турмах, будзе агучана па ўсёй Еўропе і па ўсім свеце».

Фота: БАЖ
Фота: БАЖ

Поўны рэпартаж слухайце ў плэеры ніжэй.

Comments are closed.