31 сакавіка ў Музеі вольнай Беларусі мастачка Cemra паказала свае карціны і арт-аб’екты, створаныя за апошнія тры гады ў трох розных краінах − Беларусі, Украіне і Польшчы.
LAZARET − гэта і містыка, і экспрэсіўная моц, і тэрапія, і балючая сустрэча са сваімі траўмамі: тварам да твару.
Шнары і калецтва, гіганцкі жалобны вэлюм і прывід, што сыходзіць крывёю. Але ў Цемры, прынамсі, ёсць бінты, каб апрацаваць гэтыя знакі болю і ператварыць іх у рытуальны ўзор.
«Дзякую гэтай прасторы, дзе мае працы напоўніліся паветрам і святлом. Я дзякую маім сябрам і маёй маме, якая прыехала на адкрыццё выставы. Дзякую кожнаму, хто прыйшоў», − распачала імпрэзу Cemra і прызналася, што гэта першы яе праект, адмыслова да якога быў створаны тэкст, музычнае суправаджэнне і відэа. Спрычыніліся да падзеі дзясяткі, калі не сотні беларусаў Варшавы.
Напрыканцы тыдня Cemra зробіць экскурсію па сваёй персанальнай выставе і падрабязна распавядзе пра кожную з работ. Акрамя таго, у Музеі вольнай Беларусі мастачка прэзентуе калабарацыю з парфюмерам, які стварыў пах вельмі падобны да паху лазарэту.
Вялікі рэпартаж з адкрыцця выставы LAZARET слухайце ў плэеры ніжэй.
Comments are closed.