Прысуд па «справе Аўтуховіча»: фігуранты атрымалі ад 2 да 20 гадоў зняволення. Самога Мікалая Аўтуховіча прыгаварылі да 25 гадоў калоніі

17 кастрычніка Гарадзенскі абласны суд абвясціў прысуд па «справе Аўтуховіча», паводле якой праходзіць 12 чалавек. 

Мікалай Аўтуховіч атрымаў 25 год пазбаўлення волі ў калоніі строгага рэжыму.  Яго абвінавачвалі ў  “здрадзе дзяржаве”, “садзейнічанні ў тэрарыстычнай дзейнасці”, “незаконных дзеяннях з агнястрэльнай зброяй і выбуховымі рэчывамі”, “замаху на захоп улады неканстытуцыйным шляхам”, “стварэнні злачыннай арганізацыі”, “распальванні расавай, нацыянальнай, рэлігійнай” варожасці». Усяго  Аўтуховіч абвінавачваўся па 12 артыкулах Крымінальнага кодэкса, 6 з іх – за асабліва цяжкія злачынствы.

Іншыя фігуранты справы атрымалі таксама вялізныя тэрміны:

Павел  Сава — 20 гадоў пазбаўлення волі,

Уладзімір Гундар — 18 гадоў калоніі ва ўмовах ўзмоцненага рэжыму,

Вольга Маёрава — 20 гадоў калоніі, штраф 800 базавых велічыняў (25 600 рублёў),

Віктар Снегур — 19 гадоў калоніі строгага рэжыму, штраф 800 базавых,

Галіна Дзербыш — 20 гадоў калоніі,

Любоў Рэзановіч — 15 гадоў калоніі ва ўмовах агульнага рэжыму,

яе муж  Сяргей Рэзановіч — 16 гадоў калоніі ўзмоцненага рэжыму,

іх сын Павел Рэзановіч — 19 гадоў пазбаўлення волі ў калоніі ўзмоцненага рэжыму, штраф 600 базавых велічыняў.

Ірына Мельхер — 17 гадоў калоніі.

Ірына Гарачкіна — 6 гадоў і 1 месяц калоніі.

Антон Мельхер — 2 гады 6 месяцаў калоніі.

Працэс вёў суддзя Максім Філатаў, які знаходзіцца пад санкцыямі Еўрасаюза.