Палітолаг Уладзімір Воля: чатыры асноўныя наступствы псеўдарэферэндумаў на часова акупаваных тэрыторях

27 верасня кіраўнікі калабарацыйных уладаў часова акупаваных тэрыторый выклалі справаздачы аб тым, што рэферэндумы па ўваходжанню ўкраінскіх абласцей, часова акупаваных Расіяй, паспяхова прайшлі. Такім чынам, акупацыя выйшла на новы ўзровень — спробы надання захопніцкім дзеянням выгляду легітымнасці.

Украінскі палітолаг Уладзімір Воля ў эфіры «Світанку свабоды» пракаментаваў гэты палітычны фарс, выказаўшы думку, што злачынствам ёсць нават не самі гэтыя рэферэндумы, а тыя наступствы, што за імі надыдуць.

Сцісла:

• Прадстаўнікі калабарантаў абвесцілі, што ўсё прайшло па іх плане, бо яны і не збіраліся праводзіць рэальны рэферэндум. Проста прайшліся з аўтаматамі па дамах. А пад дулам аўтамату хто заўгодна прагаласуе за што заўгодна. Таму вынікі цалкам чаканыя.
• Нікога там ні меркаванні людзей, ні яны самі не цікавяць. І тое, як «вызваліцелі» руйнуюць дамы і мірную інфраструктуру, гэтаму доказ. Усе гэтыя рэферэндумы — не больш чым выставы з мэтай стварэння медыйнай карцінкі.
• З улікам таго, што вялікая колькасць людзей адтуль з’ехала, то аб рэпрэзентатыўнасці гэтых псеўдарэферэндумаў няма чаго казаць. Таму інакш, як нахабнай, цынічнай выставай гэтыя дзеянні не назавеш. А для жыхароў таго рэгіёну гэта сумная, трагічная гісторыя, бо яны апынуліся ў становішчы, калі іх фактычна пазбавілі выбару.
• Гэтыя рэферэндумы могуць бумерангам ударыць па самой Расіі. Бо яна паказала прыклад, як нахабна можна весці сябе і з самой Расіяй. І не варта здзіўляцца, калі на тэрыторыі адміністратыўнай адзінкі самой Расіі хтосьці захопіць уладу. Калісьці Расія асуджала такія спосабы, якія зараз ужывае сама і стварае прэцэдэнт для іншых.
• Але трэба ўлічваць, што рэферэндум — гэта выстава, з дапамогай якой намагаюцца аформіць анексію, крадзеж часткі ўкраінскай тэрыторыі.
• І рэальнае злачынства не рэферэндум, а гэтая анексія. Пуцін хоча схаваць гэтыя тэрыторыі пад ядзерны шчыт Расіі. Але ён стварыў прыклад і зараз, напрыклад, чаму Тайвань не можа таксама прагаласаваць за ўваход у склад ЗША і схавацца пад яе ядзерны «парасон»?
• Зараз важна, як Кітай адрэагуе на вынікі рэферэндумаў, бо калі ён не засудзіць іх, тады Тайваню таксама можна скарыстацца такой тэхналогіяй незалежнасці імя Пуціна. Тое ж самае можна казаць і пра Індыю і пра іншыя краіны, якія зараз займаюць нейтральную пазіцыю.
• Другі аспект наступстваў — Казахстан. Уладзімір Воля не выключае, што калі Пуцін абвесціць анексію і яна будзе зацверджана Саветам Федэрацыі, Казахстан выйдзе з складу АДКБ ці, як мінімум, прыпыніць дзеянне ў ім.
• Таму што, па-першае, у Казахстана ёсць тэрыторыі, якія Расія лічыць сваімі. Па-другое, Пуцін махлярскім спосабам уцягвае Казахстан у вайну з Украінай. Бо спачатку абвяшчае тэрыторыі расійскімі, а потым абвінавачвае Украіну, што тая напала на Расію. Па правілах АДКБ Казахстан павінен прадставіць вайсковую дапамогу свайму партнёру па дамове.
• І застанецца Пуцін з Лукашэнкам, якому няма куды дзявацца. Лукашэнка зайграўся. Эканоміка пад санкцыямі і не развіваецца, перапоўнена крызавымі з’явамі ў адрозненні ад Казахстану, у якога ёсць рэсурс.
• Трэці аспект наступстваў рэферэндумаў — незадаволенасць сярод расіян. Адно пытанне назіраць за вайной з канапы, як на рэаліці-шоў, і зусім іншае — падпасці пад мабілізацыю.
• Апроч таго, можна падлічыць фінансавыя страты за анексію. Праз санкцыі грошай у бюджэце моцна не хапае, а Пуцін навесіў на бюджэт яшчэ і траты на вайну і на ахову анексаваных тэрыторый. Пуцінскія ідэі ўспрымаліся расіянамі як велічныя, пакуль не крануліся іх асабістага камфорту. А так можна чакаць, як у хуткім часе ў Расіі з’явіцца прымаўка «Хопіць карміць Данбас» накшталт дзейснай «Хопіць карміць Каўказ».
• Ці вартыя гэтыя тэрыторыі тых страт і той цаны, якой яны ёй дастаюцца? Напрыклад, толькі замарозка расійскіх актываў на 300 мільярдаў даляраў. На што памянялі гэтыя 300 мільярдаў? На разбураныя чатыры вобласці, якія трэба аднаўляць?
• Палітолаг мяркуе, што Пуцін працягне спробы наступу на Херсонскім і Запарожскім напрамках. Расія не была гатова да такой вялікай вайны, і ёй бракуе забеспячэння. І як бы там ні было, гэта пачатак агоніі, нават калі вайна зацягнецца, а лінію фронту часова замарозяць.
• У бліжэйшы тыдзень можна чакаць заяў ад Брытаніі, Францыі і ЗША, што ў адказ на ядзерны ўдар па Украіне яны адкажуць адпаведным ударам па Расіі. Гэта патрэбна, каб захаваць ядзерны парытэт, каб вайна была шчырай.
• Пуцін зараз выглядае як амбал, які прайграў вайну, у якога франты пасыпаліся, армія пагана забяспечана і арганізавана. І Пуцін зараз хавае сваю паразу за рэферэндумамі, анексіяй і ядзерным шчытом.