«Гэта была памылка». Дэпартаваны з Украіны беларускі палітэмігрант Валянцін Цішко распавёў пра сваё вяртанне ў Львоў

Беларускі палітэмігрант – актывіст і журналіст Валянцін Цішко, якога 3 траўня Дзяржаўная міграцыйная служба дэпартавала з Украіны і вывезла ў Польшчу, здолеў вярнуцца назад. Зараз ён зноў дома ў Львове. Валянцін Цішко распавёў як адбылося вяртанне.

— Пацвярджаю з радасцю, што я вярнуўся, я зноў ва Украіне, я ў Львое. Як я і спадзяваўся, гэта была памылка. Мяне памылкова выдварылі. Але дзякуй Богу, і дзякуй дабрачыннаму фонду «Вільна Білорусь», а такама дзяржслужбоўцам украінскім, якія спрычыніліся да майго вяртання, дзякуй ім, што гэтую памылку мы выправілі і я зноў ва Украіне, зноў магу дапамагаць Украіне, як валанцёр, разам змагацца з расійскім агрэсарам. Зараз я буду займацца пытаннямі сваёй легалізацыі, каб ужо ўсё гэта было афіцыйна, каб больш не было такіх памылак. Я Украіну люблю і бачу, што Украіна любіць мяне таксама. 

— Як адбывалася вяртанне? З табой нехта звязваўся, ці ты падтрымліваў сувязь праз «Вільну Білорусь»? 

— Так, са мною звязалася «Вільна Білорусь», бо відавочна, што гэта нейкая памылка. І мы пачалі разам працаваць над тым, каб гэтую памылку выправіць. А далей усё проста – аўтобус, дарога, мяжа, пашпартны кантроль і «ради вітати Вас на теріторії України». 

— А ці звязваліся неяк з табой афіцыйныя органы – дзяржаўная міграцыйная служба ці іншыя службы ўкраінскія? 

— Не. Я вёў усю камунікацыю з прадстаўнікамі «Вільної Білорусі». Але, улічваючы сітуацыю, хутчэй за ўсё, службы тут таксама задзейнічаны, бо проста так гэтага б не адбылося. 

— А ці былі нейкія пытанні пра пераходзе мяжы? 

— Не. Ніякіх пытанняў, праблемаў не было. Працэдура майго праходжання мяжы заняла прыкладна гадзіну. Але гэта літаральна на 5 – 10 хвілін даўжэй, чым усіх іншых астатніх людзей з аўтобуса. Але гэта не дзіўна: грамадзянін Беларусі едзе ва Украіну падчас вайны з трэцяй краіны. Гэта нармальна, што патрэбны быў час, каб разабрацца, хто я такі і чаго я назад еду. 

— Якія зараз планы ва Украіне? 

— Займацца пытаннем легалізацыі, звязвацца з міграцыйнай службай, вырашаць гэтую сітуацыю, атрымліваць легальны статус, каб далей ужо больш афіцыйна валанцёрыць і змагацца з акупантамі.